Ho sakey to rukh say pardey ko hatta kar daikhiye
Aaj apna haal-e-dil hum ko suna kar daikhiye
Jaan jaaiyen gay wafa mein hum kisi say kam nahin
Aap bas dil ka dareecha khatkhata kar daikhiye
Jab kabhi mujh ko bulaaney ki tamana dil mein ho
Mairey koochey ki taraf bas kasmasa kar daikhiye
Aap ke zor-o-sitam ko kab talak sehta rahoon
Mairey jazbon ko kabhi to aazma kar daikhiye
Ye taqaaza mairi ulfat ne kiya hai aap sey
Diakhiye jab bhi kabhi to muskura kar daikhiye
Zeest ki raanaaiyaan hon,Ya nishaat-e-wasl ho
Ho sakey to mairi aankhon mein sama kar daikhiye
Kyun jhijhaktey hain humaari khasta haali daikh kar
Kitni wusat hai humaarey dil mein aa kar daikhiye